family man

फॅमिली मॅन 

होता माझा एक बाप 

होता डोक्याला मोठा ताप 

सतत म्हणायचा अभ्यास कर 

स्वतः होता अंगुठा छाप 

राग उगवायचा त्याच्या मनात 

जैसे जंगली गवत...

नोकरी त्याची वाट आईला 

आहे तिची सवत...

रात्री असायची खुश स्वारी

मस्त येयची झुलत 

नकार नव्हता कश्याचाही 

सतत होकाराची मान डुलत...

श्रीमंतच होता वाटतं तो 

आम्ही पडलो बहुतेक कमी

शिकवले त्याने अजून दोघे 

भाऊ आमचे चुलत...

आठवते मला नेले होते 

आम्हाला एकदा दर्यावर 

सारे होते आनंदात 

बाप एकटाच होता रडत...

डोळे पुसले, ओठ हसले 

पेटवली त्याने बिडी 

तेव्हाच कळाले होते मला 

आयुष्य म्हणजे अंतहीन सापशिडी 

उद्योग केले, धंदे केले 

कधी फसले कधी फसवले...

त्याने आयुष्य ठीक उसवले

आमचा फॅमिली मॅन आधी कधीतरी 

मुलगा होता बाप झाला

बाप होता म्हातारा झाला 

होताचा ही नव्हता झाला...

आणि आमच्या तारुण्यात चर्चा होती 

ऐकल होत लग्न झाल्यावर 

बाप झालं की,

 व्हावं लागतं

 superman आधी...

आता व्हावं लागतं 

superman आधी...    

— दुर्गेश विवेक निसळ